Thủ tướng Phạm Minh Chính đơs, dơ̆ lòt còp là cơng tàng đơs nền bơta lơh ngan lơh kơ̆ kơljap mờ bơtàu tơnguh tơl làm, ngan ngồn bơta git gơp kuơmàng, ờs mờng, lơh bơyô mờ lơh broă bal uă gah đah 2 lơgar Việt Nam mờ Cuba. Thủ tướng nting bơr gờm chờ lơgar Cuba neh bơyai lơh tĕ khà geh cồng nha. Việt Nam tam pà ală kal ke mờ Cuba gam lòt gan, Việt Nam sùm dong kờl Cuba tàm tơl gah, rơp pơn jat tai dong Cuba ală bơta lơi niam ngan rlau jơh dilah gơtùi, lơh jơh pràn nàng dong kờl lơgar Cuba tàm bơta pràn he dê, kờñ tam pà mờng chài he geh, tàm hơ̆ geh gah lơh sa suơn sre, tơnguh pràn jak lơh sa mờ gàr tơl kòi phe, ròng tam phan tàm dà…

Thủ tướng Cíñ phủ kơp kờñ 2 gah sơlơ tơnguh bơta git gơp lơh broă bal ngai sơlơ kơ̆ kơljap, sồr 2 gah pơn jat tai gàr sùm tìp mat tơm boh bơr, tơnguh cồng nha lơh broă bal 2 gah bơh ală broă lơh Pơrjum jơnau tàm sră pơ àr đah 2 Đảng, Ủy ƀan 2 Cíñ phủ bè lơh broă bal lơh sa mờ khoa họk- kông nghệ, tìp mat tơm boh bơr broă lơh sền gàr dà lơgar, sền gàr lơngăp lơngai.