Tàm dơ̆ wă, Thủ tướng Cíñ phủ ồng Phạm Minh Chính jờng rơ dơ̆ lòt còp dơ̆ 2 bơh Ƀộ trưởng Ƀộ Ngoại giao Brazil dê tus Việt Nam mờ tam pà ală jơnau kơlôi sơnơng niam ngan bè dà lơgar mờ kòn bơnus Brazil tàm dơ̆ lòt còp tàm nhai 9 nam 2023 pa do; jờng rơ ală broă lơh bơh Cíñ phủ Kwang atbồ lơgar ồng Lula da Silva dê nàng lơh kơ̆ kơljap mờ tơnguh gơnoar broă lơh sa, cíñ trị, gơnoar broă jơh nùs bơh Brazil dê tàm tiah do mờ tàm dunia mờ pin dờn là dơ̆ lòt còp bơh Ƀộ trưởng Ƀộ Ngoại giao ồng Mauro Vieira dê rơp pơgồp bơnah sơlơ tơnguh rlau tai bơta git gơp Lơh broă bal tơl làm đah Việt Nam mờ Brazil; là broă lơh ngan ngồn nàng lam lơh jat ală jơnau ring bal bơh kwang đơng lam bồ kâp dờng 2 lơgar dê tàm tơngai lài, ngan là ală gah broă mờ lơgar geh bơta pràn mờ geh jơnau kờñ, tài bơta kuơ bơh làng bol 2 lơgar, tài ring lơngai, lơh broă bal mờ bơtàu tơnguh tàm 2 tiah mờ tàm dunia.

Ƀộ trưởng ồng Mauro Vieira neh yal mờ Thủ tướng Cíñ phủ bè ală tơngume pơrjum cribơyai mờ Ƀộ trưởng Ƀộ Ngoại giao ồng Bùi Thanh Sơn; pà git 2 gah geh ală broă lơh ngan ngồn mờ ring bal tơngume lơh broă bal 2 gah đah Việt Nam mờ Brazil tàm tơngai tus, ngan là tàm ală gah mờ 2 lơgar geh bơta pràn mờ sền gròi bal bè lơh broă sa suơn sre, khoa họk kông nghệ, tam gơl năng lượng, năng lượng siñ họk.