Thủ tướng ồng Phạm Minh Chính mờ Ƀộ trưởng mò Mary Ng chờ hờp tài bơta git gơp lơh broă bal tơl làm 2 lơgar gam bơtàu tơnguh jrô ơnàng bè tơl bơta. Tŭ do, Canada là lơgar lơh broă bal kă bro dờng dơ̆ 3 bơh lơgar Việt Nam dê tàm tiah câu Mỹ mờ Việt Nam là lơgar lơh broă bal kă bro dờng ngan rlau jơh bơh Canada dê tàm tiah ASEAN. Bulah bè hơ̆, bơta pràn lơh broă bal đah 2 lơgar là dờng ngan, ngan là tàm ală gah mờ tơl gah geh bơta pràn mờ cèng bơta tàm dong kờl bal mờ gơp; pal ngui uă ngan rlau jơh ală bơta pràn do bơh ală gah lơh broă bal 2 lơgar mờ uă lơgar. Thủ tướng ồng Phạm Minh Chính sồr 2 gah pơn jat tai pơgồp bal jơh nùs nàng sơlơ tơnguh tai lơh broă bal tàm jơh ală gah kă bro, bơcri priă, tam gơl tơlir, tam gơl sồ, lơh sa mờ măi mok pa, măi mok lơh gơlik phan, mòn phan, rơcang sơndră tam gơl nhơm trồ tiah, năng lượng, khoa họk kông nghệ, bơto bơtê mờ bơsram.

Thủ tướng Cíñ phủ ưn ngài mờ kơp kờñ lơgar Canada pơn jat tai sền gròi, lơh gơlik bơta niam rlau tai nàng mpồl bơtiàn cau Việt Nam tàm Canada ơm kis, bơsram, lơh sa ƀuơn ƀuài, kơ̆ kơljap tàm lơgar do; kơp kờñ Canada pà tai priă dong kờl bơsram ai kơnòm bơsram, cau bơsram dờng Việt Nam in lòt bơsram tàm lơgar Canada.