VOV4.K’ho- Drim ngai 17/10/2022, Thủ tướng Cíñ phủ ồng Phạm Minh Chính neh wă Ƀộ trưởng drơng broă Kă bro mờ Lơh sa lơgar Australia ồng Tim Ayres di dơ̆ tus lơgar Việt Nam đơng lam bal dơ̆ cribơyai kwang bàng kấp dờng OECD - Tiah đah Jum mat tơngai lik câu Á nam 2022 tàm Hà Nội.

Thủ tướng Cíñ phủ ồng Phạm Minh Chính wă Ƀộ trưởng drơng broă kă bro mờ lơh sa lơgar Australia

Thủ tướng sồr Ƀộ trưởng Tim Ayres sền gròi sơlơ tơnguh rlau tai lơh broă bal lơh sa-kă bro mờ bơcri priă đah 2 lơgar, tàm hơ̆ geh broă Australia pơn jat tai pờ mpồng drà kă bro ai ală  gah phan lơh geh bơh broă lơh sa suơn sre, phan tam dà lơgar Việt Nam dê; lơh geh ală bơta ai ală mpồl lơh sa kă bro lơgar Việt Nam bơcri priă tàm lơgar Australia mơkung pơn jờng mpồl lơh sa kă bro lơgar Australia sơlơ tơnguh bơcri priă tàm Việt nam. Thủ tướng kung sồr Australia lơh geh bơta ƀuơn ai mpồl bơtiàn Việt Nam tàm Australia ơm kis, lơh broă, gơ rờm bal ƀuơn ƀoài mờ lơgar do dê. Ƀộ trưởng Tim Ayres đơs nền Cíñ phủ Australia sùm sền dờng màng bơta gĭt gơ̆p lơh broă bal jŏ jòng mờ Việt Nam mờ kơ̆p kờñ lơh niam rlau tai bơta gĭt gơ̆p đah 2 gah mờ lơgar Việt Nam; sơlơ tơnguh rlau tai lơh broă bal mờ Việt Nam tàm ală gah lơh sa- kă bro- bơcri priă, lơh sa suơn sre, bơto bơtê, bơta niam chài mờ lơh broă.

 VOV/K’Hạnh mblàng