Tàm dơ̆ wă, Thủ tướng Cíñ phủ ồng Phạm Minh Chính đơs nền, Việt Nam sùm sền dờng màng mờ kờñ sơlơ tơnguh lơh broă bal tơl làm mờ lơgar Bỉ, kung bè ală tiah mờ mpồl bơtiàn bơh lơgar Bỉ dê; jờng rơ dơ̆ lòt còp lơgar Việt Nam bơh Ƀộ trưởng- Kwang atbồ tiah Flanders dê bal mờ mpồl 30 mpồl lơh sa kă bro dờng kung bè tơngume lơh broă li la mờ ală Ƀộ, gah broă lơh dà lơgar, ală tiah bơh Việt Nam dê. Thủ tướng Cíñ phủ ồng Phạm Minh Chính sồr Ƀộ trưởng- Kwang atbồ tiah Flanders pơn jat tai sền gròi bơtàu tơnguh bơta git gơp mờ Việt Nam, kuơmàng bè lơh broă bal lơh sa, kă bro mờ bơcri priă, pơgồp bơnah sơlơ tơnguh mờ lơh kơ̆ kơljap rlau tai bơta git gơp đah Việt Nam mờ Bỉ. 2 gah ring bal sơlơ tơnguh lơh broă bal bè lơh sa suơn sre kơ̆ kơljap, bơcri priă lơh mờ tuah wàs ală gơl gùng dà lềng; kơlôi sơnơng lơh mpồl lơh broă bal pa đah tiah Flanders mờ ală tiah bơh lơgar Việt Nam dê nàng tơnguh bơta niam, cồng nha lơh broă bal đah Việt Nam mờ Bỉ.