VOV4.K’ho- Ngai 11/05/2022, di dơ̆ tus bal Pơrjum dờng kwang bàng kấp dờng kwơ màng ASEAN mờ Mỹ, còp mờ lơh broă tàm lơgar Mỹ mờ Liên hợp quốk, tàm càr lơgar Washington, lơgar Mỹ, Thủ tướng Cíñ phủ ồng Phạm Minh Chính neh wă Ƀộ trưởng Tài cíñ lơgar Mỹ mò Janet Yellen.

Thủ tướng Cíñ phủ ồng Phạm Minh Chính wă Ƀộ trưởng Tài cíñ lơgar Mỹ

Tàm dơ̆ wă, Thủ tướng Cíñ phủ đơs niam ngan tàm bơnàng jă là gĭt gơ̆p lơh broă bal tơl làm Việt Nam mờ Mỹ, lơh broă bal đah 2 lơgar bè lơh sa- kă bro mờ priă jền tơngai pa do geh bơta bơtàu tơnguh uă ngan. Thủ tướng sồr Cíñ phủ mờ Ƀộ Tài Cíñ lơgar Mỹ dong kờl mờ lơh broă bal niam mờ Việt Nam bè bơtàu tơnguh lơh sa, bơsong bơta lòng gùt plai ù, tàm hơ̆ geh broă tam gơl năng lượng mờ lơh jat jơnau hơ tàm COP 26, lơh broă bal nàng bơt bơtàu ală broă lơh lơh sa tàm tiah do, kơ̆ kơljap gĭt gơ̆p kă bro mờ ală broă lơh tăc bro phan. Thủ tướng kơ̆p kờñ lơgar Mỹ tam pà bal bơta mờng chài bơtàu tơnguh drà kă bro priă jền, ngan là drà kă bro chứng khoán, drà kă bro ù tiah dùl bă niam, ờdo ờdă, song dơ pă pơgồp bơnah kơ̆ kơljap lơh sa dờng.

Cau mblàng K’Hạnh