VOV4.K’ho - Drim òr (22/07), Thủ tướng ồng Phạm Minh Chính wă ồng Maeda Tadashi, Củ tịc HĐQT Ngân hàng lơh broă bal dunia lơgar Nhờk (JBIC). Tàm dơ̆ wă, Thủ tướng đơs tờm, lơgar Việt Nam sùm sền lơgar Nhờk là lơgar geh broă lơh bal kwơ màng lài ngan, jŏ jòng, kờñ bal broă lơgar Nhờk pơgồp bal pràn ai bơta ring lơngai, lơh broă bal mờ tơnguh bơtàu tàm tiah do mờ tàm dunia, ai broă lơh git gơ̆p đah bàr lơgar mŭt tàm tơngai tơnguh bơtàu pa wèt tus tơnkah 50 nam crơng gơs broă lơh git gơ̆p bal tàm nam 2023.

Thủ tướng đơs tờm, dùl tàm ală broă ai lài, lài ngan đah bàr lơgar dê là chồl pràn broă lơh sa bal, sền gròi khà priă gơmù, phan kă bro gơguh kas, tơnguh broă bơcri priă kă bro... Tàm tơngai tus, tàm nùs nhơm “git gơ̆p, đềt mềr, pin dờn, geh cồng nha”, Thủ tướng hòi jà lơgar Nhờk mờ Ngân hàng lơh broă bal dunia lơgar pơn jăt tai pơlam broă lơh mờ cíñ phủ bal mờ Quốk hội lơgar Nhờk; pơn jăt tai cri bơyai mờ pơgồp bal nền nòn mờ ală anih lơh broă lơgar Việt Nam dê nàng jòi geh ală gùng dà broă lơh bal geh cồng nha, tơnguh bơtàu rơlao tai broă lơh git gơ̆p lơh broă bal jŏ jòng, jrô ơnàng đah lơgar Việt Nam mờ lơgar Nhờk tàm tơngai pa.

Cau mblàng Ndong Brawl