VOV4.K’ho- Mho ngai 7/10, Thủ tướng Cíñ phủ ồng Phạm Minh Chính wă ồng Park Noh Wan, Đại sứ Hàn Quốc tàm Việt Nam tus còp să tơngăc di dơ̆ tơn jơh tơngai lơh broă tàm Việt Nam.

Thủ tướng Cíñ phủ ồng Phạm Minh Chính wă Đại sứ Hàn Quốc tus tơngăc

Thủ tướng jờng rơ uă ngan broă Đại sứ neh geh ală tă pơgồp kwơ màng tàm broă sơlơ tơnguh lơh broă bal lơh sa đah Việt Nam mờ Hàn Quôk, ngan là dong kờl tàm tơrbŏ lơh broă bal đah ală tiah Việt Nam mờ ală mpồl lơh sa kă bro, ală tiah bơh lơgar Hàn Quôk dê; pơgồp bal bơyai lơh geh cồng nha ală dơ̆ cribơyai đah Thủ tướng Cíñ phủ mờ mpồl bơtiàn mpồl lơh sa kă bro Hàn Quôk nàng kờñ bơsong ală bơta kal ke, bơta kòl yan, pơgồp bơnah gờñ lơh sir jơnau kờñ lơh geh priă jền bơh bro đah 2 gah geh khà 100 tơmàn dolar Mỹ tàm nam 2023 mờ 150 tơmàn dolar Mỹ tàm nam 2030. Thủ tướng Cíñ phủ ồng Phạm Minh Chính đơs ngan Việt Nam sùm sền dờng màng bơta gĭt gơ̆p đah 2 gah mờ lơgar Hàn Quôk mờ kơ̆p kờñ sơlơ tơnguh lơh broă bal pràn kơl dang mờ geh ngan rlau tai bơta gĭt gơ̆p đah 2 lơgar dê.

VOV Tây Nguyên- Cau mblàng K’Hạnh