VOV4.K’ho- Ngai 30/3, tàm hìu lơh broă Cíñ phủ, Thủ tướng Cíñ phủ ồng Phạm Minh Chính neh wă Đại sứ lơgar Mỹ tàm lơgar Việt Nam ồng Marc E.Knapper tus lùp còp di dơ̆ Đại sứ sơn đờm tơngai lơh broă. Tàm dơ̆ wă, Thủ tướng nting bơr gờm chờ Đại sứ Marc E.Knapper neh geh Kwang atbồ lơgar Mỹ ồng Joe Biden jàu kơnòl broă dờng màng pa mờ tus wơl Hà Nội lơh broă tàm gơnoar broă Đại sứ; ai tơnggŏ bơta pin dờn tàm gơnoar broă pa, Đại sứ geh pơn jat tai tă pơgồp rlau tai ai git gơp lơh broă bal tơl làm đah 2 lơgar.

Thủ tướng đơs nền wơl Mỹ là dùl tàm ală lơgar lơh broă bal kuơmàng khà dùl bơh Việt Nam dê mờ Việt Nam kơp kờñ bal mờ Mỹ pơn jat tai lam git gơp lơh broă bal tơl làm bơtàu tơnguh tàm jơh ală bơta, geh cồng nha, ngan ngồn jat bơnàng jă ki ngàm bơta lơngap lơngai is, gơnoar tờm, tơl làm ù tiah, thể cế cíñ trị mờ bơta krơi is bơh gơp dê. Đại sứ Mỹ ồng Mar E.Knapper ai tơnggŏ bơta chờ hờp geh tus wơl lơh broă tàm lơgar Việt Nam, đơs niam bơta bơtàu tơnguh pràn kơldang bơh lơgar Việt Nam dê tàm tơl gah, ngan là tàm broă rơcang sơndră kòp bơtờp mờ bơtàu tơnguh wơl lơh sa tơnơ̆ kòp bơtờp.

Cau mblàng K’Duẩn