Thủ tướng Cíñ phủ ồng Phạm Minh Chính jờng rơ Kwang ătbồ ƀang Hạ Saxony dơ̆ sơnrờp tus còp lơgar Việt Nam bal mờ mpồl lơh sa kă bro uă ngan tàm tơngai bơta gĭt gơ̆p lơh broă bal kwơ màng đah Việt Nam mờ Đức bơtàu tơnguh niam ngan.

Thủ tướng Cíñ phủ ồng Phạm Minh Chính sồr 2 gah chồl tơnguh lơh broă bal bè cíñ trị- cribơyai broă mờ lơgar ndai, kă bro- bơcri priă, rcang sơndră mờ tam gơl trồ tiah, bơto bơtê broă lơh, lòt nhơl, tìp mat lơh kwèng làng bol, nàng kờñ cèng wơl bơta kwơ ai tơl lơgar in, sơlơ tơnguh bơta gĭt wă bal mờ gơ̆p đah làng bol 2 lơgar dê mờ tă pơgồp ai ring lơngai, lơh broă bal mờ bơtàu tơnguh tàm tiah do mờ tàm dunia. Tàm nùs nhơm jơh nùs, sơrmah sơrmài mờ pin dờn, Thủ tướng Cíñ phủ ồng Phạm Minh Chính sồr Gơnoar atbồ ƀang Hạ Saxony sồr ală mpồl lơh sa kă bro bơh ƀang do dê bơcri priă tàm lơgar Việt Nam tàm ală gah pràn mờ jơnau kờñ bơh 2 gah dê bè kông nghệ kao, tam gơl sồ, tam gơl tơlir, rcang sơndră tam gơl trồ tiah...