VOV4.K’ho - Mho òr (31/05), tàm hìu lơh broă Cíñ phủ, Thủ tướng Cíñ phủ ồng Phạm Minh Chính neh wă ồng Pascal Soriot, Kwang atbồ dờng Tập đoàn Astrazeneca di tàm dơ̆ kwang đơng lam mpồl lơh sơnơm AstraZeneca tus còp mờ lơh broă tàm lơgar Việt Nam jăt jơnau jà bơh Thủ tướng Cíñ phủ.

Tàm dơ̆ wă, Thủ tướng Cíñ phủ ồng Phạm Minh Chính đơs niam gơnoar bal mờ broă pơgồp bal bơh Tập đoàn AstraZeneca tàm broă lơh ngan tam dră mờ kòp Kovid-19 tàm dunia mờ tàm lơgar Việt Nam. Thủ tướng ưn ngài broă lơh bal nền nòn mờ geh cồng nha đah gah lơh sơnơm AstraZeneca mờ lơgar Việt Nam tàm tơngai do, tàm hơ̆ uă ngan là să tờm ồng pascal Soriot neh sền gròi đơng lam gah lơh sơnơm AstraZeneca ai gờñ mờr 30 tơlăk ding sơnơm vaccine sơndră mờ kòp Kovid-19 ai lơgar Việt Nam in tàm nam 2021. Pơn jờng kơrnoăt pờ ơnàng tiah bơcri priă mờ rơndăp broă lơh, lơh broă bal lơh sơnơm kờp priă 90 tơlăk dolar Mỹ tàm lơgar Việt Nam. Thủ tướng tơlik nùs nhơm chờ hờp bè broă Ƀộ Y tế mờ Kông ty AstraZeneca Việt Nam gam lơh ngan cri bơyai nàng wèt tus broă kĭ sră kah bal bè lơh broă bal đah bàr gah dê. Do là tơngu me tờm nàng gah lơh sơnơm AstraZeneca lơh broă bal jŏ jòng tàm lơgar Việt Nam, tơlik jơnau hơ lơh broă bal mờ lơgar Việt Nam tàm broă tơnguh bơtàu kơl jăp.

Cau mblàng Ndong Brawl