VOV4.K’ho- Mho ngai 02/06, tàm Hìu duh broă Cíñ phủ, Thủ tướng Cíñ phủ ồng Phạm Minh Chính neh wă Trung tướng ồng Khamlieng Outhakaysone, Thứ trưởng Ƀộ Quôk phòng, Kwang ătbồ Mpồl pơlam broă Mpồl ling klàng làng bol lơgar Lào mờ Mpồl kwang bàng kâp dờng ala măt mpồl ling klàng làng bol lơgar Lào gam geh dơ̆ lòt còp ngan ngồn lơgar Việt Nam.

Tàm dơ̆ wă, Thủ tướng đơs nền: Đảng, Dà lơgar, Cíñ phủ mờ làng bol Việt Nam jơh nùs sền dờng màng tơnguh bơta gĭt gơ̆p lơh broă bal mờ lơgar Lào; pơn jăt tai tơnguh mờ lơh kơ̆ kơl jăp bơta gĭt gơ̆p lơh bơyô bal ờs mờng bơh yau mờ bơta lơh broă bal tơl làm đah Việt Nam mờ Lào neh geh ală rơnàng kwang bàng đơng lam bồ roh uă dà kơlhề bơ̆t bơtàu mờ lơh gơs. Gùng dà broă lơh ờ tŭ lơi tam gơl bơh Việt Nam dê là pơn jăt tai lơh ngan jơh pràn he dê mờ bơta lơh ngan jơh nùs uă ngan rlau jơh nàng bal mờ Lào tơnguh bơta gĭt gơ̆p lơh broă bal tam klăc bal đềt mềr đah 2 dà lơgar ngai sơlơ gơlòt mŭt jrô ngan ngồn, geh kwơ mờ geh cồng nha tàm jơh ală gah broă lơh.

Tàm hơ̆, gĭt gơ̆p sền gàr dà lơgar Việt Nam mờ Lào sùm là dùl tàm ală broă tờm kwơmàng bơh bơta gĭt gơ̆p đah 2 lơgar, tài ring lơngai, kơ̆ kơl jăp mờ bơtàu tơnguh bơh tơl lơgar dê mờ pơgồp bơnah gàr ring lơngai tàm tiah do mờ tàm dunia.

Cau mblàng Lơ Mu K’Yến