VOV4.K’ho - Mho òr (05/09), tàm hìu lơh broă Cíñ phủ, Thủ tướng Cíñ phủ ồng Phạm Minh Chính neh wă Kwang dong broă bơh Kwang atbồ lơgar Mỹ bè Trồ tiah ồng John Kerry còp mờ lơh broă tàm lơgar Việt Nam.

Thủ tướng Cíñ phủ ồng Phạm Minh Chính wă Kwang dong broă bơh Kwang atbồ lơgar Mỹ bè Trồ tiah ồng John Kerry

Tàm dơ̆ wă, bàr gah ring bal tơnguh bơtàu bơta git gơ̆p, tam klăc lơh broă bal tơl ală bơta đah lơgar Việt Nam mờ lơgar Mỹ ngai sơlơ mùl màl, mŭt tàm bơta jrô ơnàng, kơ̆ kơl jăp tàm tơngu me sền dờng màng bơta lơngăp lơngai is, geh tơl ù tiah mờ kơrnoăt cíñ trị bơh tơl lơgar dê, lơh ngan bal wèt tus lơh broă bal pa tŭ bơta geh ƀuơn. Thủ tướng ồng Phạm Minh Chính pơn jờng lơgar Mỹ tơnguh lơh broă bal mờ ală lơgar, bơh tŭ hơ̆, geh pơgồp bal bal niam rơlao ai bơta ring lơngai, kơ̆ kơl jăp, lơh broă bal, tơnguh bơtàu tàm tiah do. Lơgar Việt Nam kơ̆p kờñ lơgar Mỹ geh pơn jăt tai tơlik jơnau hơ pràn kơl dang gơwèt mờ broă kờñ bal gơnoar tờm bơh mpồl ASEAN dê, bơta git gơ̆p, tam klăc bal, lơh broă bal jŏ jòng đah mpồl ASEAN mờ lơgar Mỹ mờ bơta git gơ̆p, tam klăc bal, lơh broă bal đah Mekong mờ lơgar Mỹ. Kwang dong broă Kwang atbồ lơgar Mỹ ồng John Kerry đơs tai, lơgar Mỹ lài mờ tơnơ̆ kung ndrờm sền dờng màng bơta git gơ̆p, tam klăc bal, lơh broă bal tơl ală bơta mờ lơgar Việt Nam, kờñ lơgar Việt Nam lơh gơnoar tờm rơcang lài, mùl màl tàm tiah do mờ tàm broă sơndră wơl mờ ală bơta dunia, tàm hơ̆ geh tam gơl trồ tiah.

Cau mblàng Ndong Brawl