Tàm dơ̆ wă rò, Thủ tướng Cíñ phủ ồng Phạm Minh Chính jờng rơ uă ngan broă lơh bơcri priă lơh sa kă bro geh cồng nha bơh ală Tập đoàn dê; jờng rơ ală Tập đoàn neh mờ gam geh broă rơndăp lơh bơcri priă tàm lơgar Việt Nam; sồr ală Tập đoàn tàm broă kơlôi sơnơng lam lơh ală rơndăp broă lơh geh ngan, pơgồp bal niam mờ ală Ƀộ, ngàñ, ală mpồl lơh sa kă bro lơgar Việt Nam mờ ală lơgar lơh broă bal geh gơrềng lam lơh ală broă lơh jat di mờ jơnau sồr, ngui kông nghệ pa ngan, sơlơ tơnguh dong kờl, tàm jàu kông nghệ, ai ală mpồl lơh sa kă bro lơgar Việt Nam tus bal jrô ơnàng làm uă rlau tai tàm ală anih lơh sa gùt plai ù.

Thủ tướng pà gĭt, Việt Nam hơ rơ̆p lơh geh ală bơta ƀuơn ngan nàng Tập đoàn in bơcri priă lơh sa kă bro geh cồng nha, kơ̆ kơl jăp tàm Việt Nam; sùm sền gàr gơnoar, bơta kwơ di pal, di mờ adat boh lam bơh ală cau bơcri priă dê.