VOV4.K’ho- Mho ngai 03/10, Thủ tướng Cíñ phủ ồng Phạm Minh Chính wă mò Era Dabla Norris, Kwang ătbồ Mpồl jăt sền bơh Kes priă Priă jền dunia (IMF) dê bè lơh sa dờng mờ broă priă jền mờ priă ngui nàng tăc blơi phan bơh ală lơgar tàm mpồl dê gam geh dơ̆ lòt còp mờ lơh broă tàm Việt Nam. Thủ tướng ồng Phạm Minh Chính ưn ngài ală bơta dong kờl kwơmàng ngan mờ IMF lời ai lơgar Việt Nam in bơh ală nam sơnrờp bơtàu tơnguh tus tŭ do, tơngai rềp ndo là bè broă bơto pơlam gùng dà broă lơh, dong kờl bơta chài mờ bơto cau lơh broă, kwơmàng là ală jơnau yal mblàng sền, sền swì mờ bơto sồr ai ală gah broă lơh ătbồ lơh sa tàm tơngai gơbàn kòp Kovid-19. 

Cribơyai bè broă lơh sa lơgar Việt Nam dê, Thủ tướng pà gĭt, bal mờ broă pơn jăt tai gròi sền kòp Kovid-19, rài lơh sa lơgar Việt Nam dê tŭ do gàr kơ̆ kơl jăp sùm mờ bơtàu tơnguh wơl niam ngan. Broă lơh đơng pơlam bơh Cíñ phủ Việt Nam dê gam geh lơh dùl bă ngăc ngar, rơcăng lài, ngan ngồn mờ di tŭ, Thủ tướng sồr IMF ai lài dong kờl Việt Nam là dùl lơgar gam bơtàu tơnguh; tơnguh tai broă lơh bơto pơlam gùng dà broă lơh ai Cíñ phủ mờ ală anih lơh broă geh gơrềng in bè đơng pơlam lơh sa, tam dră wơl mờ bơta rềs àr gơ aniai gơguh tai tŭ do; pơn jăt tai ai pà ală broă bơto bơtê, dong kờl bơta chài ai ală gah broă lơh ătbồ lơh sa; jơh nùs dong Việt Nam bơtàu tơnguh lơh sa tơlir, gơdờp bal mờ tam gơl trồ tiah mờ tam gơl sồ...

Cau cih VOV Tây Nguyên- Cau mblàng Lơ Mu K’Yến