VOV4.K’ho- Mho ngai 08/3, Thủ tướng Cíñ phủ ồng Phạm Minh Chính neh wă ală mpồl lơh sa kă bro Mpồl duh broă kă bro lơgar Mỹ mờ mpồl ASEAN. Tàm dơ̆ wă, Thủ tướng pà git, Việt Nam sùm sền dờng màng mờ kơp kờñ pơn jat tai lơh niam rlau tai, bơtàu tơnguh git gơp lơh broă tơl làm Việt Nam mờ Mỹ tus khà pa ngan ngồn mờ geh cồng nha rlau, tàm hơ̆, lơh broă bal lơh sa- kă bro- bơcri priă là tơngume tờm, bơta pràn pơn jờng dờng ngan tàm git gơp đah 2 lơgar.

Ală mpồl lơh sa kă bro đơs niam ală broă lơh jơh nùs dong kờl mpồl lơh sa kă bro tàm tŭ tơngai kal ke tài gơ rềng bơh kòp Kovid-19; ai tơnggŏ bơta sền ngềr ngan tềng đap ală cồng nha rơcang sơndră kòp bal mờ khà cit sơnơm vaccine uă khà dùl dunia mờ broă gơ dờp ờdo ờdă, ngac ngar, gròi sền geh cồng nha kòp bơtờp bơh lơgar Việt Nam dê.

 Ală mpồl lơh sa kă bro đơs 2, 3 jơnau dan, đơs nền kờñ sơlơ tơnguh lơh broă bal, kă bro tàm lơgar Việt Nam, kuơmàng là tàm ală gah: Tam gơl năng lượng, tơrmù tuh tơlik nhơm carbon; tam gơl sồ, pơgồp bơnah lam rài lơh sa sồ Việt Nam gơguh bơh 21 tơmàn dolar Mỹ tàm nam 2021 tus 57 tơmàn dolar Mỹ tàm nam 2025.

Cau mblàng K’Duẩn