Tàm dơ̆ wă rò, Thủ tướng Cíñ phủ pin dờn dơ̆ lòt còp bơh Ƀộ trưởng ồng Bakhtiyor Saidov dê rơ̆p pơgồp bơnah kwơmàng tàm broă tơnguh tai mờ rề ơnàng lơh broă bal 2 gah tàm tơngai tus. Thủ tướng đơs là, jăt tàm bơnàng jă gĭt gơ̆p lơh bơyô ờs mờng bơh yau, kờñ pal sơlơ tơnguh tai lơh broă bal dồ bă tơl làm tàm ală gah broă Đảng, Cíñ phủ, Quôk hội bơh tàm pơgơl mpồl kwang bàng lòt còp bal mờ gơ̆p; kung bè lơh mpồl lơh broă bal đah ală ƀộ gah lơh broă dà lơgar. Kwơmàng 2 gah kờñ pal pơgồp bal nàng lam lơh geh cồng nha dơ̆ tìp măt đah ală mpồl lơh sa kă bro mờ ală tiah bơh 2 lơgar dê tàm ngai do 19/03.

Thủ tướng Cíñ phủ ồng Phạm Minh Chính sồr 2 lơgar sơlơ tơnguh rlau tai lơh broă bal bè bơto bơtê, niam chài- đơs crih tam ya, lòt nhơl mờ tìp măt lơh kwèng bal đah làng bol, tìp măt đah ală mpồl cíñ trị- mpồl bơtiàn, bè cau bơsram dờng lài do, ơruh pơnu pơgồp bơnah sơlơ tơnguh rlau tai bơta gĭt wă ai rơnàng kơnòm să in mờ bơ̆t bơtàu nùs nhơm lơh bơyô bal đah làng bol 2 lơgar.