VOV4.K’ho- Mho ngai 31/03, tàm Hìu duh broă Cíñ phủ dê, Thủ tướng Cíñ phủ ồng Phạm Minh Chính neh wă rò Đại sứ lơgar Thái Lan tàm Việt Nam ồng Nikorndej Balankura tus còp să. Tàm dơ̆ wă, Thủ tướng ồng Phạm Minh Chính jờng rơ ngan bơta gĭt gơ̆p Tam klăc lơh broă bal jŏ jòng sơlơ tơnguh tai đah Việt Nam mờ Thái Lan tàm tơngai do bơtàu tơnguh niam bơnĕ ngan, gơlòt mŭt ngan ngồn tàm jơh ală broă.

Thủ tướng ồng Phạm Minh Chính đơs sùm, 2 lơgar pal pơn jăt tai sơlơ tơnguh rlau tai lơh broă bal pin dờn, tàm hơ̆ geh broă lam lơh jăt geh cồng nha cribơyai, tìp măt kwang bàng kâp dờng mờ ală kâp, ală broă lơh broă bal đah 2 gah, ngan là broă pơrjum Cíñ phủ đah 2 Cíñ phủ mờ Ủy ƀan tàm bơrlŭ bal bè lơh broă bal đah 2 gah. Thủ tướng sồr bàr gah lơh mhar cribơyai bè broă dờp Sră cơng tàng neh cĭt tơl ding vaccine bơh gơ̆p dê; pờ wơl ală gùng par kă bro bè ờs mờng, ai tơl ală bơta ai năc lòt nhơl in, lòt rê kă bro đah 2 lơgar; đơs nền Việt Nam geh pơn jăt tai pơgồp bal niam mờ Thái Lan nàng kờñ lơh geh cồng nha bơh Nam APEC Thái Lan 2022.

            Cau mblàng Lơ Mu K’Yến