Thủ tướng Cíñ phủ ồng Phạm Minh Chính chờ hờp mờ jờng rơ ồng Shiota Koichi mờ Mpồl kwang bàng ala măt càr Kagoshima còp lơgar Việt Nam di tŭ 2 lơgar gam tơngkah kir sơnrai 50 nam lơh bơta gĭt gơ̆p cribơyai broă mờ lơgar ndai đah Việt Nam mờ Nhờk.

Jăt Thủ tướng đơs, gĭt gơ̆p Tam klăc lơh broă bal jrô ơnàng làm uă đah Việt Nam mờ Nhờk gam tàm tŭ tơngai bơtàu tơnguh niam bơnĕ. Lơgar Nhờk pơn jăt tai là lơgar tam klăc lơh broă bal lơh sa kwơmàng khà dùl bơh lơgar Việt Nam dê, là cau dong kờl priă ODA dờng ngan rlau jơh, cau bơcri priă mờ cau tam klăc lơh broă bal lòt nhơl dơ̆ pe, cau tam klăc lơh broă bal kă bro dơ̆ puan bơh lơgar Việt Nam dê. Thủ tướng đơs là, đah càr Kagoshima mờ ală tiah bơh lơgar Việt Nam dê geh uă bơta pràn gơtùi tàm bơtơl ai gơ̆p in, bơta tơl pràn lơh broă bal gam uă ngan.

Thủ tướng sồr Kwang ătbồ càr Kagoshima mờ Gơnoar ătbồ càr do hòi jà ală mpồl lơh sa kă bro bơh càr dê bơcri priă uă rlau tàm lơgar Việt Nam tàm ală gah broă càr geh bơta pràn bè rơndeh ô tô, điện tử ƀán zẫn, lơh broă sa sươn sre, lơh gơlik phan lơh geh bơh sươn sre mờ lơh sa mờ măy mok dong kờl.