Thủ tướng Cíñ phủ tơngŏ bơta ngoh rơngăc, ưn ngài Ƀộ trưởng ồng Jakkapong Sangmanee bal mờ mpồl kwang bàng lơgar Thái Lan neh tus lơgar Việt Nam ies tơ̆p ƀồc Tổng Ƀí thư, đơs ngan do là cơng tàng ai nùs nhơm lơh bơyô bal, đềt mềr bal mờ tam pà bal đah kwang đơng lam bồ mờ làng bol 2 lơgar dê.

Di dơ̆ do, Thủ tướng Cíñ phủ đơs wơl jơnau jà Thủ tướng lơgar Thái Lan ồng Srettha Thavisin còp lơgar Việt Nam mờ đơng lam bal pơrjum Cíñ phủ bal Việt Nam mờ Thái Lan dơ̆ 04 tàm tơngai di pal. Bàr gah kung cribơyai mờ ring bal bè bàr pe pơlam gùng dà lơh broă bal 2 gah đah 2 lơgar dê tàm tơngai tus, geh bal broă lam lơh geh cồng nha broă lơh “ 3 tàm tơrbŏ bal” sơlơ tơnguh tai lơh broă bal tàm ală gah lơngăp lơngai, kă bro, lòt nhơl mờ gùng lòt jun pơndiang phan, tàm hơ̆ sền gròi tàm tơrbŏ bal pràn kơl dang rlau tai bè gah rơndeh par, gùng lòt ù gờl mờ gùng rơndeh ồs.