Mho mang ngai 06/04, tàm Hìu duh broă Cơldŭ lơh broă Cíñ phủ dê, Thủ tướng Cíñ phủ ồng Phạm Minh Chính neh wă rò Phó Thủ tướng Cíñ phủ lơgar Nga ồng Dmitry Chernyshenko gam geh dơ̆ lòt còp ngan ngồn lơgar Việt Nam mờ đơng lam bal dơ̆ pơrjum dơ̆ 24 Ủy ƀan bàr Cíñ phủ lơgar Việt Nam mờ Nga bè lơh broă bal lơh sa- kă bro mờ jak chài- măy mok geh lơh bơh ngai 05 tus ngai 07/04 nam 2023 do.

Tàm dơ̆ wă rò, Thủ tướng Cíñ phủ lơgar Việt Nam ồng Phạm Minh Chính đơs nền, Cíñ phủ lơgar Việt Nam sùm sền dờng màng bơta gĭt gơ̆p lơh bơyô bal ờs mờng bơh yau mờ lơh broă bal niam bơnĕ jăt tàm nùs nhơm Tam klăc lơh broă bal jŏ jòng tơl ală bơta đah Việt Nam mờ Nga. Bàr gah jờng rơ ngan ală cồng nha lơh geh tàm lơh broă bal đah bàr lơgar tàm tơngai lài bal mờ broă gĭt gơ̆p cíñ trị geh gàr sùm, lơh broă bal tàm ală gah broă ờs mờng bơh lài pơn jăt tai geh chồl tơnguh; đơs nền pơrjum dơ̆ 24 Ủy ƀan bàr Cíñ phủ lơgar Việt Nam mờ Nga là tŭ niam ƀươn ƀoài nàng 2 lơgar in cribơyai mờ ring bal ală broă lơh sơlơ tơnguh rlau tai lơh broă bal đah bàr lơgar, kung bè lơh gơlik ală bơta gơn kơnờm pa nàng kờñ lam lơh geh cồng nha ală rơndăp broă lơh lơh broă bal tàm tơngai tus.