VOV4.K’ho- Mho ngai 01/06, Thủ tướng Cíñ phủ ồng Phạm Minh Chính neh wă ồng Khamphan Phommaphat, Ủy viên Ƀộ Cíñ trị, Tổng Thanh tra dà lơgar Lào tus còp, lơh broă mờ cribơyai lơh broă bal mờ Thanh tra Cíñ phủ Việt Nam.

Thủ tướng ồng Phạm Minh Chính wă Tổng Thanh tra Dà lơgar Lào

Thủ tướng Cíñ phủ ồng Phạm Minh Chính đơs nền, bơta gĭt gơ̆p Việt Nam mờ Lào là bơta gĭt gơ̆p kwơ màng, sùm geh bơt bơtàu mờ bơtàu tơnguh; đơs sùm tàm khăt dùl bơta lơi, Việt Nam sùm sền dờng màng ngan lơh broă bal mờ lơgar Lào, sùm lơh jơh pràn he dê nàng bơtàu tơnguh pràn kơl dang bơta gĭt gơ̆p oh mi rềp mềl, lơh broă bal niam, geh cồng nha tàm jơh ală gah. Thủ tướng jờng rơ uă cồng nha cribơyai đah 2 Mpồl kwang bàng Thanh tra dà lơgar Lào mờ Thanh tra Cíñ phủ Việt Nam; đơs ngan Cíñ phủ Việt Nam pơn jờng mờ ai ală bơta ƀuơn ngan nàng 2 gah in sơlơ tơnguh lơh broă bal bè thanh tra, bơsong jơnau yă mờ rcang sơndră sa kwề sa kwà; rcang ai tơl ală bơta nàng Thanh tra Cíñ phủ Việt Nam in bơyai lơh ală khoá bơto bơtê broă lơh ai kwang bàng in jat jơnau kờñ bơh Thanh tra dà lơgar Lào dê.

Cau mblàng K’Hạnh