Tàm dơ̆ wă, Thủ tướng Cíñ phủ ồng Phạm Minh Chính đơs nền, Việt Nam là lơgar kờñ ring lơngai, là lơgar tàm mpồl geh kơnòl bơh mpồl bơtiàn dunia dê, sùm jờng rơ củ nghĩa uă lơgar, jờng rơ ală kơrnoat pal jat kwơ màng bơh adat boh lam dunia dê geh cih tàm Hiến chương Liên hợp quôk, tàm hơ̆ geh kơrnoat pal jat ring lơngai bơsong ală tam pìt tam phà dunia.

Việt Nam gam bơt bơtàu rài lơh sa is, rcang is, pơgồp bal mờ mŭt gơ rờm bal dunia ngan ngồn, jrô ơnàng, geh cồng nha, tàm hơ̆ geh mŭt gơ rờm bal bè adat boh lam. Den tàng, Thủ tướng kơ̆p kờñ lơh broă bal niam mờ PCA tàm broă tă pơgồp jơnau đơs, tam pà bal bơta mờng chài, dong kờl bơsong ală tam pìt tam phà tàm tơngai mŭt gơ rờm bal dunia.