Tàm dơ̆ wă, Thủ tướng Cíñ phủ jờng rơ bơta tă pơgồp bơh Mpồl gơnoar cih ASEAN mờ să tờm Tổng Thư ký dê tàm broă bal bơh Mpồl bơtiàn ASEAN dê; jờng rơ mờ ưn ngài Tổng Thư ký neh dờp jơnau jà tus bal Cribơyai rài tơnơ̆ do ASEAN dơ̆ sơn rờp geh bơyai lơh jat jơnau bơceh lơh bơh Việt Nam dê; đơs nền Việt Nam lời uă nùs nhơm ai jơnau bơceh lơh do in mờ bơta kơp kờñ Cribơyai rài tơnơ̆ do ASEAN rơp gơs dơ̆ cribơyai ală jơnau bơceh lơh sơlơ tơnguh tai lơh broă bal tiah do, dong kờl ală dơ̆ cribơyai, gùng dà broă lơh ngan ngồn bơh ASEAN dê in, pơgồp bơnah bơt bơtàu dùl Mpồl bơtiàn ASEAN tam klac bal, brồ guh is mờ bơtàu tơnguh kơ̆ kơljap. 

Di dơ̆ do, Thủ tướng mờ Tổng Thư ký kung cribơyai ală broă geh gơ rềng ndai tàm lơh broă bal ASEAN bè sơlơ tơnguh tai ală broă lơh ngan bơh Timor Leste dê gờñ gơ gơs là lơgar geh jơng tơl làm bơh ASEAN dê, sơlơ tơnguh tai pràn jak bơh Mpồl gơnoar cih ASEAN dê bơh broă rơ wah ală ƀộ geh pràn jak bơh ală lơgar, tàm hơ̆ geh Việt Nam.