Tàm tơngai tus, Thủ tướng sồr tơrgùm đơng lam, sồr lơh bàr pe kơnòl broă tờm, tàm hơ̆ đơs loh, tơrgùm lơh niam broă lơh mblàng yal, lơh geh bơta ring bal uă bè bơta gĭt wă, bơta dùl nùs bal tàm ală rơnàng làng bol tàm tiah he dê, pal lam lơh jăt niam, nền nòn, kơ̆ nùs hòi jà, lơh ai cau in dờn, lơh geh bơta ring bal tàm jơh ală anih lơh broă cíñ trị, bơta ring bal, kờñ bal bơh Làng bol dê.

Rơndăp tăp sèng anih lơh broă sră pơ àr gơnoar ătbồ pal lơh geh bơta tơrgùm bal jơh ală bơta, dùl ròt bal, lơh jăt jăt tơl tŭ tơngai, tơl tŭ tơngai geh broă tờm, broă di, geh broă lơh dipal, kơ̆ kơl jăp, kơrhia ngan mờ geh cồng nha; tiah geh bơta ƀươn den lơh lài, tiah ờ hềt geh bơta ƀươn den gĭt nền gùng dà tŭ tơngai dipal nàng lơh jăt.

Thủ tướng sồr, rơndăp tăp sèng anih lơh broă sră pơ àr gơnoar ătbồ kâp kơnhoàl, kâp xã pal gơ jăt bal mờ broă tam gơl pa, rơndăp tăp sèng mpồl kwang bàng lơh broă bơh ală anih lơh broă cíñ trị dê lời wơl dùl êt nă cau, lơh broă gơtùi mờ geh cồng nha; rơndăp tăp sèng wơl mờ tơnguh uă cồng nha mpồl kwang bàng, kông cưk, viên cưk; ngui măy mok broă lơh sră pơ àr gơnoar ătbồ dê, bơ̆t bơtàu gơnoar ătbồ lơh broă mờ măy mok, mpồl bơtiàn lơh broă mờ măy mok.