Tơngai lài, mpồl Kảñ sát gùng lòt neh lơh niam broă lơh tă pơgồp jơnau đơs, lơh mờ lơh sir adat boh lam; ală jơnau sồr kwơmàng bè broă lơh sền gàr niam rơndăp tăp sèng lơngăp lơngai lòt rê tàm gùng bơh Ƀan Ƀí thư, Cíñ phủ, Thủ tướng Cíñ phủ dê. Lơh jăt broă lơh sền gàr niam rơndăp tăp sèng lơngăp lơngai lòt rê tàm gùng, lam ală mpồl kwang đơng lam bồ Đảng, Dà lơgar, ală mpồl cau năc tàm lơgar, dunia lòt còp mờ lơh broă tàm lơgar Việt Nam, sền gàr dồ bă lơngăp lơngai ngan, niam bơnĕ ngan. Jơh nùs tus bal rơcăng lài mờ trồ tiah lơh aniai, mìu nhàc dà tih dà cò, lòt jòi dong klàs rềs àr, dong kờl cau.

Đơs tàm dơ̆ nting bơr sa tềp tàm do, Thủ tướng Phạm Minh Chính sồr, mpồl Kảñ sát gùng lòt lơh jăt niam gơnoar broă sền gàr niam rơndăp tăp sèng lơngăp lơngai lòt rê tàm gùng. Pơn jăt tai tam gơl pa pràn kơldang gùng dà broă lơh lòt sền, gròi sền, lơh glài broă lơh tìs bè rơndăp tăp sèng lơngăp lơngai lòt rê tàm gùng; sơlơ tơnguh tai ngui jak chài măy mok tàm tŭ lơh broă nàng sền gŏ, lơh glài broă lơh tìs, pal lơh loh làng, song dơ pă ờ ndơ̆p mpồn. Tàm dơ̆ sa tềp bơhiàn yau dà lơgar nam Giáp Thìn, lam lơh niam lòt sền, gròi sền, lơh glài kràñ broă lơh tìs; Bañ lời gơlik geh jơnau kòl gùng, di tŭ bơsong jơnau digơlan gơ aniai, rềs àr gùng lòt, tài bơta chờ hờp chờ hờñ mờ lơngăp lơngai bơh làng bol dê.