Pơrjum Kwang bàng Kâp dờng Krơi is geh lơh bơh ngai 04 tus ngai 06/03 là tềl kah kwơmàng tàm jơnau kah yau bal bơh lơgar Australia dê gơ wèt mờ kơnhoàl ù tiah do. Tềl kah tơngŏ jơnau hơ bơh lơgar Australia dê tàm broă tơnguh tai lơh broă bal mờ kơnhoàl ù tiah đah jum măt tơngai lik câu Á. Tơngume tờm bơh Pơrjum Kwang bàng Kâp dờng Krơi is dơ̆ do dê là tơngkah kir sơnrai 50 nam gĭt gơ̆p tam klăc lơh broă bal tìp măt tơm bơh bơr đah lơgar Australia mờ Asean. Pơrjum Kwang bàng Kâp dờng Krơi is tơrgùm tàm puan gah broă tờm kwơmàng: Kă bro, Đơng lam bồ pa pơnrơ, Nhơm trồ tiah mờ Năng lượng sàng goh mờ Lơh broă bal Gùng dà lềng. Ală broă lơh loh làng, geh: Cribơyai CEO Mpồl lơh sa kă bro bơtòm tơrgùm ală kwang đơng lam bồ mpồl lơh sa kă bro bơh lơgar Australia mờ Tiah đah jum măt tơngai lik câu Á dê; Pơrjum ală Mpồl lơh sa kă bro di mơ mờ dềt (SME); Cribơyai Nhơm trồ tiah mờ Năng lượng sàng goh; Pơrjum Lơh broă bal Gùng dà lềng.

Dơ̆ lòt còp ngan ngồn lơgar Australia mờ New Zealand bơh Thủ tướng Cíñ phủ Phạm Minh Chính mờ pơ ùr bal mờ mpồl kwang bàng kâp dờng ala măt lơgar Việt Nam dê rơ̆p dong lơh gơlik bơta pràn kơldang lơh jrô ơnàng rlau tai gĭt gơ̆p mờ lơgar Australia bal mờ New Zealand mờ nàng kờñ pơn jăt tai lam lơh jăt gùng dà lơh broă mờ lơgar ndai ờ tŭ lơi tam gơl mờ Pơrjum dờng Đảng dơ̆ XIII neh sồr.