Pơrjum geh Cíñ phủ lơgar Hàn Quốk pơgồp bal mờ Mpồl lơh sơnơm dunia (WHO) bơyai lơh nàng tam pà ală jơnau kơlôi sơnơng, ală gùng dà broă kờñ lơh bal mờ kông nghệ pa tàm gah lơh sơnơm vaccine mờ y siñ.

                                               Thủ tướng ồng Phạm Minh Chính geh jơnau đơs tàm pơrjum

Tàm jơnau đơs să tờm dê, Thủ tướng ồng Phạm Minh Chính đơs tờm, kòp Kovid-19 tơlik geh mờ gơtờp neh lơh gơrềng uă ngan, tơl ală bơta tus ală lơgar. Tàm dơ̆ tam dră mờ kòp gơtờp pa do, he neh sơlơ gŏ loh làng rơlao tus mờ bơta kwơ màng bơh sơnơm vaccine dê.

Lơgar Việt Nam neh bơyai lơh ală broă sơndră, tam dră mờ kòp gơtờp, tàm hơ̆, lơgar Việt Nam neh lơh geh cồng nha broă lơh bal mờ lơgar ndai sơnơm vaccine mờ broă cit sơnơm vaccine ờ sa priă uă ngan bơh lài tus tŭ do. Thủ tướng đơs tờm, lơgar Việt Nam là lơgar tàm mpồl lơh ngan, geh kơnòl mờ mpồl bơtiàn dunia, lơgar Việt Nam hơ geh pơgồp bal nền nòn, geh cồng nha tàm broă kơlôi sơnơng, lơh, tam jào kông nghệ, pơgồp bal tàm bơta kơ̆ kơl jăp broă ai sơnơm vaccine mờ ală phan y siñ tàm gùt dunia.