VOV4.K’ho- Đơs tàm dơ̆ pơrjum Mpồl đơng lam bè broă lơh rơcăng sơndră kòp Kovid-19 dê, Thủ tướng Cíñ phủ ồng Phạm Minh Chính sồr gah lơh broă geh gơnoar bal mờ ală tiah jăt sền nền broă gơlik geh, bơta gơbàn bơh kòp bơtờp dê tàm lơgar mờ tàm dunia, jăt sền nền jơnau bơto sồr bơh ală mpồl dunia, ală cau jak chài dê; di tŭ gŏ, yal tơngkah lài, sơndră wơl mờ ală jơnau gơbàn ờ hềt yal lài geh, bè virus digơlan gơdờp mờ vaccine halà digơlan geh ală jơi tam gơl să pa, kòp bơtờp digơlan gơbàn kal ke, ờ gơtùi gĭt lài rlau.

Thủ tướng Cíñ phủ ồng Phạm Minh Chính đơng lam dơ̆ pơrjum

Lơh pràn rlau tai broă cĭt vaccine, ngan là mờ ală cau pơhìn uă, bè cau dờng sơnam, cau geh lài kòp tàm să, kơnòm dềt, kông ñân lơh broă tàm ală tiah lơh sa mờ măy mok, tiah lơh gơlik phan tăc mờ lơgar ndai, tiah drà dờng...; tơrgùm gròi sền rềs àr, ală cau kòp gơbàn kơn jơ̆ mờ chơ̆t să; pơn jăt tai sơlơ tơnguh tai lơh sơnơm rơcăng gàr lài, lơh sơnơm ƀòn lơgar; rơcăng lài bè sơnơm; tơnguh uă bơta gĭt wă làng bol dê. Thủ tướng sồr pal lơh sir broă cĭt vaccine ai kơnòm dềt bơh 12 tus 18 sơnam in tàm nhai 04 do; gơwèt mờ ală oh dềt bơh nam 12 sơnam bol he pal tơngŏ bơta jơh nùs uă ngan rlau jơh lơh sir broă cĭt tàm qúy 2 nam do tơn.

Cau mblàng Lơ Mu K’Yến