Ngai 12/4, tàm pơrjum dơ̆ 5 Mpồl đơng lam Dà lơgar ală broă lơh, rơndap broă lơh kuơmàng dà lơgar, Thủ tướng Cíñ phủ ồng Phạm Minh Chính neh jàu ală kơnòl broă gơ wèt mờ tơl mpồl rơndap broă lơh ngan ngồn ai ală ƀộ, gah broă lơh dà lơgar, càr, ƀòn dờng, mpồl lơh broă in. Kuơmàng, gơ wèt mờ mpồl rơndap broă lơh gam lam lơh, tàm hơ̆ geh 3 rơndap broă lơh gùng rơndeh ntoat rat kờp dŭ lơh gơs mờ ai ngui di tàm ngai 30/4 nam do (geh: Mai Sơn- Gùng dờng 45; Dầu Giây- Phan Thiết; Phan Thiết- Vĩnh Hảo), Thủ tướng sồr, Ƀộ Giao thông Vận tải pal jơh nùs sồr ală cau tờm lơh rơndap broă lơh ngan sơrbac mhar, sơlơ tơnguh rlau tai phan bơna, măi mok, cau lơh broă nàng di tŭ ai ngui di tơngai hơ pơrgon, gàr bơta niam- bơta kơ̆ kơljap, lơngăp lơngai lơh broă, gàr niam tiah ơm kis.

Gơ wèt mờ 14 càr, ƀòn dờng là anih tờm đơng lam 3 gùng rơndeh ntoat rat tiah đah mat tơngai lik- tiah đah mat tơngai mut mờ 2 gùng pleh, Thủ tướng sồr tơnguh mhar tơngai lam lơh nàng sơn đờm lam lơh ală rơndap broă lài mờ ngai 30/6 tus do. Thủ tướng sồr Ƀộ Giao thông Vận tải pơgồp bal mờ ală ƀộ, gah broă lơh, ală tiah mhar bơsong sră nggal ală rơndap broă lơh, tơrgùm jơh ală kòl yan gơ rềng tus tam gơl ù lơh kòi, ù brê, mpồl lơh broă, broă lơh mờ ală bơta dong kờl nàng yal Ủy ƀan Thường vụ Quôk hội, Quôk hội in sền sơ wì.