Jat jơnau yal bơh Ƀộ Thông tin mờ Truyền thông dê, tam gơl sồ geh sơlơ tơnguh pràn jat gùng dà jơh gùt làng bol, tơl làm, geh cồng nha ngan ngồn, tă pơgồp uă ngan tàm bơta bơtàu tơnguh lơh sa – mpồl bơtiàn dà lơgar. Lơh sa sồ, mpồl bơtiàn sồ pơn jat tai bơtàu tơnguh pràn kơldang, phan bơna sồ bơh mpồl lơh sa kă bro Việt Nam dê pơn jat tai bơtàu tơnguh mờ tac tus làm gùt ală lơgar.

Đơs pơn dut pơrjum, Thủ tướng ồng Phạm Minh Chính cih dờp, jờng rơ mờ đơs niam ală broă lơh ngan, bơta pơn đơl pràn mờ cồng nha lơh geh bơh ală ƀộ, gah broă lơh, càr, ƀòn dờng dê. Thủ tướng đơs nền, tŭ do ờ “lơh tơrlòng” tai mờ pal “tơnguh mhar”, “tam gơl pràn” bal mờ nùs nhơm brồ guh pràn kơldang. Sơlơ tơnguh bơta ring bal tàm jơnau git wă mờ broă lơh bơh cau đơng lam bồ dê tàm tam gơl sồ, đòm jat bơta lam lài, lơh krơh lài, lòt lài; sơlơ tơnguh pràn lơh sir gùng dà, broă lơh, broă dong kờl nàng sơlơ tơnguh pràn tam gơl sồ, di mờ bơta ờs mờng ală lơgar dê; chồl pràn bơtàu tơnguh lơh sa sồ, mpồl bơtiàn sồ, làng bol sồ.