VOV4.K’ho-Dờp jơnau jà bơh Kwang đơng lam bồ kấp dờng mờ Cíñ phủ lơgar Nga, Thủ tướng Cíñphủ ồng Phạm Minh Chính neh tus bal dơ̆ Cribơyai Lơh sa tiah đah mat tơngai lik bơyai lơh tàm ƀòn dờng Vladivostok, lơgar Nga jat broă lơh kŭp rùp.

Thủ tướng Cíñ phủ ồng Phạm Minh Chính tus bal dơ̆ cribơyai Lơh sa tiah đah mat tơngai lik jat broă lơh kŭp lùp

Tàm jơnau đơs, Thủ tướng Cíñ phủ ồng Phạm Minh Chính đơs sùm dơ̆ cribơyai geh kwơ màng geh ngan nàng kờñ sơlơ tơnguh lơh broă bal dunia, pơgồp bơnah gàr  niam bơta kơ̆ kơljap, lơh broă bal mờ bơtàu tơnguh tàm tiah câu Á- Thái Bình Dương mờ tàm dunia. Thủ tướng Cíñ phủ đơs ngan Việt Nam rcang lài bơt bơtàu rài lơh sa krơi is, rcang is mờ lơh ngan mŭt gơ rờm bal mờ dunia jrô ơnàng làm uă mờ geh ngan. Bè bơta gĭt gơ̆p lơh sa đah 2 gah Việt Nam mờ Nga, Thủ tướng Cíñ phủ đơs sùm: sùm sền dờng màng bơta gĭt gơ̆p lơh broă bal jŏ jòng tơl làm mờ lơgar Nga, jờng rơ ngan cồng nha lơh broă bal lơh sa 2 lơgar dê tàm ală nam do, ngan là tàm ală gah bè năng lượng, lơh sa mờ măy mok mờ bàr pe gah broă ndai. Bol añ kơ̆p kờñ pơn jat tai sơlơ tơnguh lơh broă bal gơwèt mờ ală gah, gah broă mờ 2 gah geh bơta ƀuơn, bơta pràn, ngui uă ngan rlau jơh ală tŭ niam bơh broă lam lơh jat Hiệp địñ kă bro khat gơboh đah Việt Nam  mờ Mpồl tam klăc lơh sa câu Á- câu Âu. Thủ tướng Cíñ phủ đơs ngan Việt Nam jờng rơ broă pơgồp tam klăc bal lơh sa mờ lơgar Nga, ngan là tiah Viễn Đông, mờ ală lơgar câu Á- Thái Bình Dương, sơlơ tơnguh bơta gĭt gơ̆p lơh broă bal jŏ jòng ASEAN mờ Nga.

Cau mblàng K’Hạnh