VOV4.K’ho- Drim ngai 25/07, tàm Hà Nội, Quân ủy dà lơgar, Ƀộ Quôk phòng bơyai lơh pơrjum quân cíñ jơh gùt ling klàng 6 nhai bồ nam 2022. Ồng Phạm Minh Chính, Thủ tướng Cíñ phủ, Ủy viên Quân ủy dà lơgar tus bal mờ đơng lam pơrjum.

Thủ tướng Cíñ phủ tus bal pơrjum Quân cíñ jơh gùt ling klàng 6 nhai bồ nam 2022

6 nhai bồ nam 2022, Quân ủy dà lơgar, Ƀộ Quôk phòng đơng lam, sồr lơh jơh gùt ling klàng tam klăc bal, ring bal, lơh ngan pơnđơl pràn, lơh sir tơl làm ală kơnòl broă, uă kơnòl broă lơh sir niam ngan, geh kơnòl broă lơh sir jak ngan. Bè kơnòl broă tờm 6 nhai lồi nam, jơh gùt ling klàng rcang lài, nhap nhar gĭt loh, kờp dŭ lài gờñ, đơs di ală bơta, di tŭ cribơyai mờ Đảng, Dà lơgar in geh gùng dà broă lơh bơsong geh cồng nha ală bơta gơlik geh. Pơn jat tai cribơyai ai ngui, lam lơh ală broă lơh jŏ jòng, rơndap broă lơh, ală adat boh lam bè ling klàng, sền gàr dà lơgar; lơh jat niam gùng dà broă lơh pơgồp bal mờ sền gàr dà lơgar bal mờ lơh sa- mpồl bơtiàn; lam lơh jat niam broă lơh sền gàr dà lơgar tàm ƀộ, ngàñ, ală tiah mờ bơto bơtê sền gàr dà lơgar, bơta lơngap lơngai ală cau in; Gàr niam sùm broă lơh rcang lài tam lơh, atbồ kràñ tềng hơđang kơlwàng trồ, tàm dà lềng, tiah nhàr lơgar, tàm dơlam dà lơgar, sền gàr kơ̆ kơljap gơnoar tờm, kơnhoàl ù tiah dà lơgar, ală broă lơh bơtàu tơnguh lơh sa dà lềng.

Cau mblàng K’Hạnh