VOV4.K’ho- Di sa tềp Bun Pi May bơh lơgar Lào mờ sa tềp Chol Chnam Thmay bơh lơgar Campuchia dê, Thủ tướng Cíñ phủ ồng Phạm Minh Chính neh hòi điện thoại nting bơr gờm chờ Thủ tướng lơgar Lào ồng Phankham Viphavanh mờ Thủ tướng lơgar Campuchia ồng Hun Sen.

Tàm dơ̆ cribơyai tàm điện thoại mờ Thủ tướng Lào ồng Phankham Viphavanh, Thủ tướng Phạm Minh Chính jơh nùs gờm chờ ală cồng nha kuơmàng mờ Cíñ phủ bal mờ làng bol lơgar Lào oh mi neh lơh geh tàm broă lơh jat Nghị quyết pơrjum dờng dơ̆ 11 bơh Đảng làng bol kac màng Lào dê mờ broă rơndap lơh bơtàu tơnguh lơh sa- mpồl bơtiàn 5 nam dơ̆ 9; ai tơnggŏ bơta pin dờn, tềng đap bơta đơng lam bồ jak chài bơh Đảng làng bol kac màng Lào dê, làng bol lơgar Lào oh mi geh lơh geh ală cồng nha dờng màng rlau tai.

Tàm dơ̆ cribơyai tàm điện thoại mờ Thủ tướng Campuchia ồng Hun Sen, Thủ tướng Phạm Minh Chính ai tơnggŏ bơta pin dờn, tềng đap bơta đơng lam bồ jak chài bơh Thủ tướng Hun Sen dê, lơgar Campuchia geh ngai sơlơ bơtàu tơnguh pas sơm, lam lơh geh cồng nha ală broă lơh tàm lơgar, broă lơh cribơyai mờ lơgar ndai kuơmàng tàm nam 2022, tàm hơ̆ geh dơ̆ tĕ khà Hội đồng xã, sơnah ƀòn mờ lơh niam gơnoar broă Củ tịc ASEAN nam 2022.

Cau mblàng K’Duẩn