VOV4.K’ho- Mho ngai 18/07, Thủ tướng Cíñ phủ ồng Phạm Minh Chính neh wă ồng Axel van Trotsenburg, Kwang atbồ dờng đơng pơ lam Ngân hàng dunia (WB).  Thủ tướng jờng rơ uă broă Kwang atbồ dờng đơng pơ lam Ngân hàng dunia còp Việt Nam, pà gŏ bơta gĭt gơ̆p ngai sơlơ niam, geh cồng nha đah 2 gah; đơs sùm Việt Nam sùm sền Ngân hàng dunia là cau gơ̆p bơyô niam, gah lơh broă bal bơtàu tơnguh dờng màng ngan; ưn ngài Ngân hàng dunia uă nam do neh dong kờl priă jền, bơto pơlam broă lơh dờng, tă pơgồp uă ngan nàng Việt Nam bơtàu tơnguh lơh sa- mpồl bơtiàn Việt Nam dê.

Cribơyai bè ală broă dunia mờ tàm tiah do, ồng Axel ring bal, dùl nùs uă mờ nùs nhơm bơh Thủ tướng dê bè broă càn priă gùt plai ù, hòi jà tam klăc bal, jờng rơ uă lơh broă bal dunia mờ nùs nhơm uă lơgar, tàm nùs nhơm “jơh nùs, pin dờn, geh cồng nha”, mờ ală broă lơh di pal mờ bơta krơi is tơl dà lơgar dê nàng bơsong ală broă gam geh tŭ do dê bè kòp aniai, tam gơl trồ tiah, ală broă lơngap lơngai ờ geh bơh lài, gàr tơl dà, gàr tơl phan ngui sa...; tàm broă do, ồng Axel đơs là jơnau đơs bơh ală lơgar bè Việt Nam dê geh gơnoar kwơ màng ngan.

Cau mblàng K’Hạnh