VOV4.K’ho- Mho ngai 14/9, Thủ tướng Phạm Minh Chính wă ồng Hayashi Nobumitsu, Kwang atbồ Ngân hàng lơh broă bal dunia lơgar Nhờk (JBIC) lòt còp mờ lơh broă tàm lơgar Việt Nam. Thủ tướng đơs nền Việt Nam sùm sền Nhờk là lơgar lơh broă bal kuơmàng khà dùl, jŏ jòng, kờñ Nhờk tă pơgồp jơh nùs ai ring lơngai mờ bơtàu tơnguh bơh tiah do mờ tàm dunia in.

Thủ tướng sồr Kwang atbồ Ngân hàng lơh broă bal dunia lơgar Nhờk sền gròi, pơn jat tai pơgồp bal mờ ală anih lơh broă lơgar Nhờk sơlơ tơnguh rlau tai, rề ơnàng lơh broă bal bơtàu tơnguh lơh sa tơnơ̆ kòp Kovid-19, dong Việt Nam bơt bơtàu rài lơh sa lơngăp lơngai is, lơh tờm is mờ jơh nùs, rơcang lài mut gơ rờm bal dunia jrô ơnàng, ngan ngồn, geh cồng nha; bơtàu tơnguh năng lượng lơh geh wơl. Kwang atbồ JBIC ring bal mờ uă jơnau sồr lơh broă bal bơh Thủ tướng dê, tàm hơ̆ geh broă gơ rềng tus rơndap broă lơh jồr zờu Nghi Sơn; đơs niam pràn jak đơng lam bồ, sồr lơh mờ atbồ bơh Cíñ phủ Việt Nam dê, Việt Nam neh gàr kơ̆ kơljap lơh sa dờng tàm tŭ tơngai dunia geh uă tam gơl.

Cau mblàng K’Duẩn