Tàm dơ̆ wă rò, Thủ tướng Cíñ phủ ồng Phạm Minh Chính jờng rơ dơ̆ lòt còp lơgar Việt Nam bơh sơnrờp bơh Ƀộ trưởng Ƀộ Ngoại giao lơgar Áo ồng Alexander Schallenberg; jờng rơ ngan cồng nha cribơyai mờ Ƀộ trưởng Ƀộ Ngoại giao lơgar Việt Nam ồng Bùi Thanh Sơn mờ Cribơyai lơh broă bal đah Việt Nam mờ Áo bal mờ bơta tus bal bơh uă mpồl lơh sa kă bro bơh bàr lơgar dê tàm drim ngai 17/04/2023; tơlik nùs nhơm pin dờn dơ̆ lòt còp rơ̆p pơgồp bơnah ai gĭt gơ̆p lơh bơyô bal mờ lơh broă bal niam bơnĕ đah lơgar Việt Nam mờ Áo ngai sơlơ bơtàu tơnguh geh cồng nha ngan ngồn tàm jơh ală broă. Thủ tướng ồng Phạm Minh Chính đơs nền, lơgar Việt Nam sùm sền dờng màng mờ kơ̆p kờñ sơlơ tơnguh tai gĭt gơ̆p lơh broă bal mờ lơgar Áo, dùl dà lơgar kwơmàng bơh Mpồl Tam klăc câu Âu (EU) dê. Thủ tướng đơs sùm, bàr lơgar pal lam lơh bàr pe broă lơh chồl tơnguh lơh broă bal đah 2 lơgar tàm jơh ală gah broă mờ 2 lơgar geh bơta pràn mờ jơnau kờñ, bè: jak chài- măy mok, phan bơna, lơh broă, bơto broă lơh, tam gơl sồ, lơh sa tàm pơdar, tam gơl tơlir...