VOV4.K’ho- Mho ngai 14/10, tàm Hìu Quôk hội geh lơh Pơrjum Đảng mpồl Quôk hội mờ Mpồl đơng lam Đảng Cíñ phủ bè broă lơh rơcăng ai Pơrjum dơ̆ 4, Quôk hội khoă XV in. Thủ tướng Cíñ phủ ồng Phạm Minh Chính, Củ tịc Quôk hội ồng Vương Đình Huệ tus bal mờ đơng lam pơrjum.

Jăt Kwang ătbồ dờng Cau gơnoar cih Quôk hội, Kwang ătbồ Cơldŭ lơh broă Quôk hội dê ồng Bùi Văn Cường đơs, tàm dơ̆ pơrjum do, Quôk hội geh lơh broă tàm 21 ngai, bơdìh mờ ală rơndăp broă lơh adat digơlan geh ai jơnau đơs mờ ring bal gam uă broă “duh hồl” lơh gơlik bơta ờ suk tàm mpồl bơtiàn gơ tơngŏ geh cau tĕ khà mờ làng bol sền gròi ngan rlau jơh rơ̆p geh ală kwang bàng Quôk hội sồr yal lơh loh làng tàm ală tŭ cribơyai bè ală jơnau yal bè lơh sa- mpồl bơtiàn, kes priă dà lơgar halà ală dơ̆ lùp mờ hơ jơnau lùp.

Đơs tàm dơ̆ pơrjum, Thủ tướng Cíñ phủ ồng Phạm Minh Chính đơs niam ngan broă lơh rơcăng ai pơrjum dơ̆ 4 bơh Quôk hội dê in, broă pơgồp bal rơcăng pơrjum dơ̆ 4 geh lơh jăt kràñ cê jơh nùs, jăt di broă lơh. Bàr gah neh pơgồp bal jơh nùs ngan, geh cồng nha, ală rơndăp broă lơh adat sồr ai jơnau đơs neh geh cribơyai nền nòn ngan. Ală ủy ƀan bơh Quôk hội dê mờ ƀộ ngàñ dê neh pơgồp bal, jơh nùs bơ̆t bơtàu, broă sền ală sră nggal geh lơh jăt tàm tŭ tơngai lơyah rlau, niam rlau.

Cau cih VOV Tây Nguyên- Cau mblàng Lơ Mu K’Yến