VOV4.K’ho- Drim ngai 14/04, tàm Hìu duh broă Cíñ phủ, Mpồl duh broă tàm pơrlòng jờng rơ kâp dà lơgar tơngai lơh broă bơh nam 2021- 2026 pơrjum dơ̆ 2 bơh bơta đơng lam bơh Thủ tướng Cíñ phủ ồng Phạm Minh Chính dê, Kwang ătbồ Mpồl duh broă. Tơnơ̆ tŭ iăt ală jơnau đơs cribơyai, pơndŭt dơ̆ pơrjum, Thủ tướng ồng Phạm Minh Chính cih dờp, đơs niam ngan mờ jờng rơ nùs nhơm geh kơnòl bơh kwang bàng tàm Mpồl duh broă dê, neh geh ală broă lơh geh kwơ ngan, geh cồng nha, geh uă tă pơgồp niam ngan ai broă lơh tàm pơrlòng jờng rơ in.

Bè kơnòl broă mờ broă lơh tờm tàm nam 2022, Thủ tướng đơs loh: Lam lơh srơh tàm pơrlòng geh kwơ ngan, geh cồng nha, lơh jăt di ală jơnau kờñ, broă jàu pơlam gùng dà bơtàu tơnguh lơh sa- mpồl bơtiàn neh ai tơlik tàm Kơrnoăt Pơrjum dờng cau ala măt gùt lơgar dơ̆ XIII bơh Đảng dê, Kơrnoăt bơh Quôk hội, Cíñ phủ, Kơrnoăt Pơrjum dờng Đảng ƀộ mờ Kơrnoăt Hội đồng Ñân zân ală kâp dê. Pơn jăt tai tam gơl pa srơh tàm pơrlòng, gơ jăt bal niam mờ lơh jăt kơnòl broă cíñ trị bơh ƀộ, ngàñ, ală tiah dê jăt nùs nhơm mờ Cíñ phủ neh sồr lơh tàm nam 2022 là “Tam klăc duh rơngòt adat boh lam, rơcăng lài gơdờp bal, ờdo ờdă geh cồng nha mờ bơtàu tơnguh wơl bơtàu tơnguh”.

Cau mblàng Lơ Mu K’Yến