Pơrjum geh lơh jăt broă lơh pờ tơlik tơn tàm internet tàm tơrbŏ bal đah Anih lơh broă Cíñ phủ mờ 63 càr, ƀòn dờng gơwèt dà lơgar. Đơs pơndŭt dơ̆ pơrjum, Thủ tướng ồng Phạm Minh Chính đơs là tơnơ̆ 10 nam lam lơh jăt Nghị quyết sồ 22 neh lơh geh bơta tam gơl dờng. Gơnoar broă cíñ trị, bơta pràn bơh dà lơgar dê geh bơtàu tơnguh. Bơta gĭt gơ̆p dunia rề ơnàng. Muh mat dà lơgar dê ngan ngồn tam gơl uă ngan, GDP gơguh mờr 2 dơ̆ pơndrờm bal dùl tŭ mờ 10 nam lài do.

Thủ tướng Cíñ phủ đơs sùm tàm tơngai gam ờ uă ngan là tus tơngai Mpồl đơng lam pal lơh sir broă tơn jơh, yal mờ Bộ Cíñ trị in. Nàng lơh mhar rlau tai lơh tus lam lơh broă lơh tơn jơh, Thủ tướng sồr Mpồl đơng lam mờ Mpồl sền sơ wì tơrgùm, gờñ sền gĭt loh làng phan bơna dŭt ndơl bơh rơndăp broă lơh tơn jơh dê, hơ̆ là tă pơgồp jơnau đơs mờ Bộ Cíñ trị ai lơh jăt dùl sră nggal đơng lam bè mut gơ rờm bal mờ dunia tàm bơta pa.