Pơrjum nàng sền sơ wì, tă pơgồp jơnau đơs bè broă tă pơgồp jơnau đơs bơh làng bol dê mờ lơh sir rơndap broă lơh Adat Ù tiah (tam gơl) yal mờ Quôk hội in mờ broă iăt kơno jơnau đơs bơh Ủy ƀan Thường vụ Quôk hội dê gơwèt mờ rơndap broă lơh Adat hìu ơm (tam gơl).

Đơs tàm dơ̆ sơnđờm mut pơrjum, Thủ tướng Cíñ phủ ồng Phạm Minh Chính ;pà gĭt: Pah nhai Cíñ phủ geh 1 dơ̆ pơrjum mìng dùl tơngume bè bơt bơtàu adat boh lam, tàm tŭ bơta geh ngan kung gam gơlik geh mhar, ờ gơtùi gĭt lài. Den tàng, Cíñ phủ pal jat nền bơta geh ngan, sền dờng màng bơta geh ngan, geh bơh bơta geh ngan, ai bơh bơta geh ngan lơh bơta đo was nàng bơt bơtàu adat boh lam, tơngai pa do, ală Ƀộ, ngàñ neh rcang lài kờp sền ală sră nggal adat boh lam, sền gŏ ală bơta kòl yan, jat tàm ală bơta hơ̆ nàng tam gơl wơl, bơt bơtàu mờ lơh sir adat boh lam nàng bơsong broă bơtàu tơnguh. Quôk hội neh lơh ngan, lòt bal mờ Cíñ phủ nàng tă bơsong bơta kal ke, kòl yal tàm tŭ lơh jat kơnòl broă cíñ trị, ngan là ală bơta kòl yan geh gơrềng tus làng bol, mpồl lơh sa kă bro, jat tàm nùs nhơm gàr niam gơnoar, bơta kwơ di adat boh lam, bơta di pal bơh làng bol mờ mpồl lơh sa kă bro dê.