VOV4.K’ho- Ngai 21/08, Thủ tướng Cíñ phủ ồng Phạm Minh Chính đơng lam pơrjum pờ tơlik tơn tàm internet gùt lơgar bè “Tơnguh uă broă lơh sền gàr pràn kơldang să jan làng bol in; Rơcăng lài gơdờp bal ngac ngar, pơgồp bơnah bơtàu tơnguh wơl mhar, bơtàu tơnguh kơ̆ kơl jăp”. Pơrjum geh lơh pơgồp bal bơh broă pơrjum tơn tàm Hìu duh broă Ƀộ Y tế mờ anih tàm tơrbŏ pờ tơlik tơn tàm internet Ủy ƀan Ñân zân 63 càr mờ ƀòn dờng tàm gùt lơgar.

Đơs tàm dơ̆ Pơrjum, Thủ tướng sồr kwang bàng, cau lơh sơnơm tàm gùt lơgar pơn jăt tai đòm jăt bơhiàn pơnrơ ngan, lơh jăt geh cồng nha ală jơnau sồr, gùng dà broă lơh bơh Đảng dê, kơrnoăt boh lam bơh Dà lơgar dê, kwơmàng là ală Kơrnoăt sồ 20, 21 bè sền gàr, tơnguh uă bơta pràn kơldang să jan làng bol in mờ broă lơh khà kờp làng bol tàm bơta pa. Thủ tướng đơs sùm, broă lơh sền gàr pràn kơldang să jan làng bol in mpồl cau tờm lơh kơnòl broă do là gah lơh sơnơm mơya do kung là kơnòl bal bơh jơh ală anih lơh broă cíñ trị dê. Ală ƀộ, ngàñ, anih lơh broă pal sơlơ pơgồp bal niam mờ Ƀộ Y tế, tềng đăp măt là bơsong ală broă jal mhar bè blơi, tàm pơrlòng jòi cau blơi, bơcri priă, tơm priă tă kham sơm kòp ƀảo hiểm y tế, bơta dong kờl gơwèt mờ kwang bàng, cau lơh broă gah lơh sơnơm in.

Cau mblàng Lơ Mu K’Yến