Đơs tàm pơrjum, Thủ tướng ồng Phạm Minh Chính đơs sùm, tơnơ̆ rlau 10 nam jơh bal ală anih lơh broă cíñ trị sơm bat tê mut lơh bal, ai càn priă dong kờl mpồl bơtiàn neh gơ gơs dồ “bơta niam” mờ là dùl “bơta tờm” tàm ală broă dong kờl tơrmù rƀah, gàr tơl niam rài kis mpồl bơtiàn, lơh geh jơnau kơ̆p kơnờm bơh làng bol dê, is ồn là cau rƀah mờ cau ờ pràn tàm mpồl bơtiàn.

Tàm tơngai tus, Thủ tướng sồr Ngân hàng Cíñ sác xã hội pal pơn jat tai sền gĭt ai càn priă dong kờl mpồl bơtiàn là broă lơh kwơ màng nàng kờñ lơh jat ală gùng dà broă lơh, broă dong kờl, jơnau kờñ, kơnòl broă bơh Đảng, Dà lơgar dê bè sơlơ tơnguh tai lơh sa lòt bal mờ lơh jat ring bal mpồl bơtiàn, lơh jat ală broă lơh jơnau kờñ dà lơgar kung bè bơtàu tơnguh lơh sa- mpồl bơtiàn bơh dà lơgar dê.