Dơ̆ tơrluh ù dờng ngan rlau jơh tàm Thổ Nhĩ Kỳ kờp bơh nam 1939, lơh gĭt nđờ jơ̆t rơbô nă cau chơ̆t, gĭt nđờ rơhiang rơbô nă cau sồt să, gĭt nđờ rơbô broă bơt bơtàu gơtìp tơrlah tơrlơm mờ Thổ Nhĩ Kỳ neh pal ai jơnau yal jal mhar tàm 10 càr, mơkung hòi jà bơta dong kờl bơh mpồl bơtiàn dunia. Mờ nùs nhơm jơh nùs, Việt Nam neh ai dùl mpồl cau tàm hơ̆ geh 100 nă Kwang bàng, cau ling, tàm hơ̆ geh 76 nă kwang bàng, cau ling bơh Ƀộ Quôk phòng mờ 24 nă kwang bàng, cau ling bơh Ƀộ Kwang àng dê neh tus bal dong kờl broă lơh jòi mờ dong kờl rềs àr, ală Kwang bàng, cau ling neh pal sơr lèt gan uă ngan bơta kal ke, bơta lòng.

Đơs tàm dơ̆ jờng rơ, Dà lơgar, Thủ tướng Cíñ phủ ồng Phạm Minh Chính jơh nùs jờng rơ Ƀộ Quôk phòng, Ƀộ Kwang àng, neh rcang cribơyai mờ Cíñ phủ tàm broă bơsong ală broă dunia; đơng lam, sồr lơh, pơgồp bal niam mờ ală Ƀộ, Ƀan, ngàñ, ală tiah mờ ală mpồl geh gơrềng bơyai lơh gàr niam ai mpồl in tus bal dong kờl kòn bơnus mờ dong kờl rềs àr tơrluh ù lơh aniai tàm Thổ Nhĩ kỳ lơh sir jak ngan kơnòl broă, pơgồp bơnah tơnguh uă bơngă pin dờn, gơnoar broă bơh Việt Nam dê tàm anih lơh broă dunia dê.