VOV4.K’ho- Thủ tướng Cíñ phủ pa kĭ Rơndăp broă lơh bơtàu tơnguh gah lơh sa mờ măy mok lơh gơlik dơm chi kơ̆ kơl jăp jŏ jòng mờ geh cồng nha tơngai bơh nam 2021- 2030. Jơnau kờñ rơndăp broă lơh dê ai tơlik tus nam 2025, tăc dơm chi mờ phan lơh bơh dơm chi mờ lơgar ndai geh 20 tơmàn dolar Mỹ, ai Việt Nam ơm tàm mpồl ală lơgar khà dùl dunia bè tam, lơh gơlik mờ tăc mờ lơgar ndai dơm chi mờ phan lơh bơh dơm chi.

Tus nam 2030, gah lơh sa mờ măy mok lơh gơlik dơm chi gơ gơs là dùl gah lơh sa kwơmàng; bơ̆t bơtàu, bơtàu tơnguh măt kă bro phan bơna dơm chi Việt Nam geh bơngă pin dờn tàm drà kă bro tàm lơgar mờ dunia. 100% dơm chi, phan bơna lơh bơh dơm chi tăc mờ lơgar ndai mờ ngui tàm lơgar geh ngui bơh dơm chi dipal mờ adat boh lam, dơm chi geh sră cơng tàng ătbồ brê kơ̆ kơl jăp jŏ jòng. Nàng lơh geh jơnau kờñ do, tàm 05 nam tus geh lơh gơs 5 tiah lơh broă brê bơnơm ngui kông nghệ kao, gơhòi gơ jà bơcri priă bơh ală mpồl lơh sa kă bro lơh gơlik dơm chi mờ mpồl lơh sa kă bro lơh gơlik phan ngui dong bơtơl. Bơtàu tơnguh, rề ơnàng ală tiah, mpồl lơh sa mờ măy mok lơh gơlik dơm chi tàm ală tiah geh bơta pràn, bơta ƀươn bơtàu tơnguh.

Cau mblàng Lơ Mu K’Yến