Bàr gah cih dờp ală cồng nha lơh broă bal kwơmàng lơh geh tàm tơngai do, kwơmàng là kă bro đah 2 lơgar dê pơn jăt tai gơguh tai pràn kơldang, lơh geh 5 tơmàn 300 tơlak dolar Mỹ tàm nam 2022, gơguh 10% pơndrờm mờ nam 2021.

Thủ tướng Cíñ phủ ồng Phạm Minh Chính sồr lơgar Tây ai tơl bơta ƀươn ai phan bơna kă bro mờ lơgar ndai bơh lơgar Việt Nam dê in, ngan là phan lơh geh bơh sươn sre, phan tàm dà bơh Việt Nam dê geh tăc tàm drà lơgar Tây dê; kơ̆p kờñ 2 gah pơn jăt tai lơh broă bal jơh nùs, ngui niam ală tŭ tơngai niam uă ngan bơh Hiệp địñ Kă bro Khăt gơboh Việt Nam mờ EU nàng kờñ sơlơ tơnguh tai tàm pơgơl kă bro đah 2 gah. Di tàm dơ̆ do, Thủ tướng Cíñ phủ sồr lơgar Tây gờñ kĭ Hiệp địñ Sền gàr dong kờl bơcri priă đah Việt Nam mờ EU nàng ai tơl bơta ƀươn ai bơta gĭt gơ̆p bơcri priă ring bal, geh kwơ bal đah 2 lơgar; sồr Ủy ƀan câu Âu gờn tă bơsong sră kơryan IUU gơwèt mờ phan tàm dà lơgar Việt Nam dê, lơh geh bơta kwơ cau ngui sa lơgar Tây mờ EU in kung bè ai geh broă lơh broă sa ai gĭt nđờ rhiang rbô nă cau lơh broă tàm gah lơh phan tàm dà lơgar Việt Nam in.