Do là dơ̆ tus còp mùl màl sơnrờp ngan bơdìh câu Âu bơh Thủ tướng lơgar Luxembourg dê tàm nam 2023, mờ kung là dơ̆ tus còp lơgar Việt Nam sơnrờp ngan bơh Thủ tướng lơgar Luxembourg dê tàm rơlao 20 nam do. Drim òr (04/05), dơ̆ wă mùl màl Thủ tướng lơgar Luxembourg ồng Xavier Bettel geh bơyai lơh tàm Hà Nội.

Tơnơ̆ mờ hơ̆, Bàr Thủ tướng cri bơyai ală broă tơnguh bơtàu pa tàm bơtga git gơ̆p bal đah bàr lơgar dê. Tàm pơrjum cri bơyai, Thủ tướng Cíñ phủ ồng Phạm Minh Chính đơs, sền wơl bơta git gơ̆p lơh bơyô bal mờ lơh broă bal uă bơta mờ lơgar Luxembourg. Bàr Thủ tướng neh cri bơyai tơl ală bơta bè lơh sa mpồl bơtiàn bơh tơl lơgar dê, bơta git gơ̆p lơh broă bal đah bàr lơgar mờ ală bơta tàm tiah do, tàm dunia geh sền gròi bal. Bàr Thủ tướng ring bal bè ală broă lơh nàng lơh pràn bơta git gơ̆p mờ lơh broă bal uă bơta đah bàr lơgar dê, kwơ màng là tơnguh broă tam gơl mpồl kwang bàng ală kấp, tàm hơ̆ uă ngan là kấp dờng kung bè lơh geh cồng nha ală kơrnoăt lơh broă bal đah bàr lơgar kung bè kơlôi sơnơng lơh geh ală kơrnoăt lơh broă bal pa gơdờp bal mờ bơta geh, broă kờñ lơh broă bal, tơnguh bơtàu bal đah bàr lơgar dê.