VOV4.K’ho - Mho òr (10/01), Thủ tướng Cíñ phủ lơgar Việt Nam ồng Phạm Minh Chính bal mờ Thủ tướng Cíñ phủ lơgar Lào ồng Phankham Viphavanh tìp Mpồl lơh sa kă bro đah bàr lơgar.

  Thủ tướng Cíñ phủ lơgar Việt Nam bal mờ Thủ tướng Cíñ phủ lơgar Lào tìp Mpồl lơh sa kă bro đah bàr lơgar

Tàm dơ̆ tìp mờ kwang đơng lam bàr lơgar, ala măt ală mpồl lơh sa kă bro dờng lơgar Việt Nam mờ lơgar Lào đơs tus mờ nùs nhơm kờñ lơh broă bal, bơcri priă jŏ jòng, kơl jăp, den tàng geh uă jơnau đơs, jơnau dan mờ Cíñ phủ bal mờ ală ƀộ, gah lơh broă đah bàr lơgar. Ală mpồl lơh sa kă bro đơs geh lơh ngan nàng gờñ lơh gơs ală rơndăp broă lơh dờng, kuơ màng gam geh lơh nàng ai geh bơta pràn tơnguh lơh sa bal đah bàr lơgar.

Đơs tàm dơ̆ tìp măt, Thủ tướng Cíñ phủ lơgar Việt Nam ồng Phạm Minh Chính sồr ală Ƀộ, gah lơh broă dà lơgar, ală tiah bal mờ mpồl lơh sa kă bro bàr lơgar tơnguh broă pơgồp bal, dong kờl bal đah bàr gah lơh sa lơgar Việt Nam mờ Lào mờ bơta tờm là thể cế, priă jền, broă lơh gùng lòt pơn diang phan, ồs đèng, viễn thông, nhơl chờ, lơh broă pơgồp bal 3 tiah lơh sa Việt Nam-Lào-Campuchia mờ bal mờ ală lơgar ndai tàm tiah do.

Cau mblàng Ndong Brawl