Mho ngai 04/12, Thủ tướng Cíñ phủ ồng Phạm Minh Chính bal mờ mpồl lơh broă bơh Cíñ phủ dê neh geh dơ̆ lơh broă mờ Kwang đơng lam bồ càr Bạc Liêu nàng kờñ sền sơ wì cồng nha bơtàu tơnguh lơh sa- mpồl bơtiàn nam 2022 mờ pơlam gùng dà tàm tơngai tus; bơsong jơnau đơs jơnau dan, ală bơta kal ke, kòl yan nàng kờñ dong kờl Bạc Liêu lơh niam rlau tai ală bơta ƀuơn bơta pràn, bơtàu tơnguh mhar mờ kơ̆ kơljap.

Đơs tàm dơ̆ lơh broă, Thủ tướng Cíñ phủ ồng Phạm Minh Chính sồr, càr Bạc Liêu pơn jat tai mblàng, lam lơh jat geh cồng nha Nghị quyết Pơrjum dờng dơ̆ 13 bơh Đảng dê; Nghị quyết Pơrjum dờng Đảng bộ càr. Bal mờ hơ̆ Thủ tướng sồr, sền gròi broă lơh rơndap ù tiah nàng ngui niam ală bơta ƀuơn, bơta pràn, pờ tơlik ù tiah bơtàu tơnguh pa. Mhar lơh sir, yal mờ Thủ tướng Cíñ phủ in ring bal mờ lam lơh jat geh cồng nha rơndap ù tiah càr dê tơngai bơh nam 2021-2030, rơndap broă lơh tus nam 2050. Sơlơ tơnguh sền gàr dà lơgar- sền gàr lơngap lơngai, gàr kơ̆ kơljap broă sền gàr lơngap lơngai, rơndap tap sèng, lơngap lơngai mpồl bơtiàn; pơgồp bal niam mờ lơgar gơ̆p bơyô gàr niam lơngap lơngai, rơndap tap sèng tiah nhàr lơgar, lơh geh ală bơta mờ tiah ơm kis ƀuơn ƀoài nàng bơtàu tơnguh lơh sa- mpồl bơtiàn.