VOV4.K’ho- Ngai 17/04, Thủ tướng Cíñ phủ ồng Phạm Minh Chính mờ Mpồl kwang bàng Cíñ phủ dê neh lơh broă mờ kwang đơng lam bồ tờm ngan càr Ninh Thuận bè broă gơlik geh, cồng nha lơh jăt kơnòl broă nam 2021, qúy 1 nam 2022 mờ gùng dà broă lơh nam 2022; cồng nha 03 nam lơh jăt Kơrnoăt sồ 115 bơh Cíñ phủ dê.

Đơs tàm dơ̆ lơh broă, Thủ tướng ồng Phạm Minh Chính pà gĭt, dơ̆ pơrjum nàng sền swì, sền wơl ală broă càr Ninh Thuận neh lơh geh, ală broă ờ hềt lơh geh tàm tơngai lài, mblàng sền jơnau bơh tài gơbàn, gĭt nền ală pơlam gùng dà, jơnau kờñ, bồ tơngoh đơng lam, broă lơh dờng tàm nam 2022 mờ tàm tơngai tus; jăt tàm Kơrnoăt Pơrjum dờng cau ala măt gùt lơgar dơ̆ XIII bơh Đảng dê, broă rơndăp lơh 05 nam mờ broă rơndăp lơh 10 nam bơtàu tơnguh lơh sa- mpồl bơtiàn dà lơgar dê, Kơrnoăt Pơrjum dờng Đảng ƀộ càr, ală kơrnoăt tơngume bơh kâp dà lơgar dê, pal lam lơh jăt ngăc ngar, dipal mờ broă gơlik geh ngan ngồn tàm tiah hơ̆ dê.

Tơngai tus, càr pal ngui niam pràn kơldang bơta pràn jak krơi is, tŭ tơngai mpờl gŏ uă, bơta ƀươn tàm pơrlòng, tam gơl bơta lòng gơ gơs tŭ niam, tam gơl ală tŭ niam gơ gơs bơta gơn kơnờm pa, bơta pràn pa, lơh gơlik bơta gơdan pa, ù tiah pa ai bơta bơtàu tơnguh in, cèng wơl rài kis ngai sơlơ hờm ram, lơngăp lơngai chờ hờp ai làng bol in.

Cau mblàng Lơ Mu K’Yến